ଦୋଷ କାହାର (କବି:-ଦିଲ୍ଲୀପ କୁମାର ପ୍ରଧାନ)

ଦୋଷ କାହାର

 ଦିଲ୍ଲୀପ କୁମାର ପ୍ରଧାନ 

ଧରା ରେ ବହିଲେ             ମଳୟ ବସନ୍ତ 

                ଦ୍ରୁମ ନବ ପଲ୍ଲବୀତ 

ମାତଙ୍ଗ ଅଇରି             ଦିଏ ପତ୍ର ଝଡା 

              ଦେଖିବ ସେହି ଲଣ୍ଡିତ l 

କରି ନାହିଁ କେବେ              ପାତର ଅନ୍ତର 

           ପାଦପେ ଦିଏ ପରଶ 

ଲଣ୍ଡିତ ବାଉଁଶ             କେବେ କହେ ନାହିଁ

           ଏ କଣ ବସନ୍ତ ଦୋଷ l 

ଦେଖିଣ ଜୀମୁତ                ତୃଷାର୍ତ୍ତ ଚାତକ 

          ପୟୋ ଆଶେ ନଭ ଚାହିଁ 

ବର୍ଷେ ବଳାହକ             ହୋଇଣ ପ୍ରକୋପ 

                 ଜଳମଗ୍ନ ହୁଏ ମହୀ l 

ତଥାପି ସେ ନୀର           ତୃଷାର୍ତ୍ତ ଚାତକ 

                ମୁଖେ ଯଦି ନ ପଡ଼ଇ

ଉଦକେ କାତର          ତୃଷାର୍ତ୍ତ ଚାତକ 

             ଘନେ ଦୋଷ ଦିଏ ନାହିଁ l 

ବିବସ୍ୱାନ ଉଦେ         ବିଶ୍ଵମ୍ଭରା ଦେଖ 

            ହୋଇଣ ଚଳଚଞ୍ଚଳ 

ଲଭି ରବି ରଶ୍ମି              ସେ ପ୍ରାଣୀ ଜଗତ 

         ଆନନ୍ଦେ ହୋଇ ବିହ୍ୱଳ l 

ପେଚା ଓ ଉଲୁକ           ହୋଇ ନିଶାଚର 

         ପାଏ ନାହିଁ ଭାନୁ ପରଶ 

ହୋଇଣ ବଞ୍ଚିତ                ତପନ କିରଣ 

           ଦେବେ ପ୍ରଭାକରେ ଦୋଷ l

ଶରିରେ ମଣ୍ଡିତ            ଲଳନା ସୁବର୍ଣ୍ଣ 

               ପାଟ ସହ ପ୍ରସାଧନ 

ଗୁପ୍ତ ଅଙ୍ଗ ଯଦି            ହୋଇବ ଦର୍ଶନ 

           ଦୋଷ କିମ୍ପା ଦେବା ବସନ l 

ଆଗମ ଶର୍ବରୀ            ସେ ପ୍ରାଣୀ ଜଗତ 

             ଗମନ୍ତି ସର୍ବେ ସଦନ 

ହେଉ ଚକ୍ରବାକ             ଅବା ଚକ୍ରବାକି 

             ସଦନ ଛାଡେ ତକ୍ଷଣ l 

ରାମ ଅଭିଶାପେ            ହୋଇ ଅଭିଶପ୍ତ 

             ରାତ୍ରେ ସଦନେ ରହେନା 

ବିରହ ଜୀବନ               ଅଟଇ କରୁଣ 

             ଶର୍ବରୀ ଦୋଷ ଦିଅନା l 

ଦିଲ୍ଲୀପ କୁମାର ପ୍ରଧାନ 

ସହକାରୀ ଶିକ୍ଷକ, ସରକାରୀ ଉଚ୍ଚ ପ୍ରାଥମିକ 

ବିଦ୍ୟାଳୟ, ବାରବାଙ୍କ, ରେଢାଖୋଲ 

    ସମ୍ବଲପୁର